КЭԒИКЭԒ ИОНАН

Кэԓикэԓ мэтъатвыткоԓьэн Ионан ԓыгъоравэтԓьаеԓымэԓ еԓыԓьатъё руссиԓьэн Синодальный еԓыԓьатгыргык рээн ваԓьын

Институт перевода Библии

Москва

2018

Вэймэну ԓынъёторе кэԓигитэльытури!

Торгынан гитэркыниткы кэԓикэԓ мэтъатвыткоԓьэн Ионан, ынӄэн ӄоԓ кэԓикэԓ Пэтывэтгычьаткэн. Пэтывэтгычьат ынкъам Торвэтгычьат чеэкэй нытваӄэнат Библияк, ынӄэн Кэԓикэԓ авынкаԓекаԓ ымыԓьыкаԓейпы ваԓьын, нымкыӄинэт гивиӈитти ынанмыкы каԓегэтаё ымыԓьорыкы. Пэтывэтгычьатык нытвыӄэн миӈкэмиԓ гантомгавԓен ымыԓьэты нутэйиквин, миӈкэмиԓ гантомгавԓен о’равэтԓьан, миӈкэмиԓ ораТэнантомгыӈэты гэԓиԓин еврейыԓьэн варат ымы ганымытваԓенат ӄутти вараттэ.
Кэԓик Ионан нытвыӄэн минкэмиԓ ганымытваԓен коԓ мэтъатвыткоԓьын, мэӈин гъэнӄэтԓин вак мэтъатвыткоԓьо ынӄэната ныкавтытчоӄэн ваԓёмык эмъэнӄэтык. Ынӄэн гатваԓен тэԓенеп. Тэнантомгыӈына гатвыԓен Ионана ӄытык авынымэты Ассирийский империягты майӈынымэты Ниневия, ивык ырыкагты иӈӄун ынпэԓягъан аӄаԓтатвагырын, тармычьыӈвагыргын. Ытръэч Иона гъэнӄэтԓин, иӈӄун ыргин, израиԓыԓьэн тинэнэӄэӈыԓьыт, нъыпаанат эӄэԓтэтык ынкъам Тэнантомгыӈына ейвэчу нъыԓгынинэт. Ымы эвытԓым найыԓгавӄэн ӄытык ыргин тэнанаӄаӈыԓьэты ынӄэната гынтэквъи аԓваванвэты Ниневияйпы.
Галяк ӄутти энэчгытатэты ваԓьыт нымытвагыргыт Иона ӄынвэт вэтгатгъэ Тэнантомгыӈэты, ытръэч гэпыннэвԓин титэ ԓьунин миӈкэмиԓ Этына ейвэчу ԓыгнинэт ниневияԓьыт. Ынкы Этына, рыкаԓыровнэн Ионана, минкэмиԓ ымыԓьываратэты ныейвэчетӄин, микынти ныӄыԓгиԓюӄинэт эӄэԓтэтык. Этын-Тэнантомгыӈ ванэ ытръэч израилыԓьэн варатэн, ымы ымнотаеквэкэн, ымы гынникин, тыӈэчьыкин ымоча Ыныквэтгавэты ваԓьыт, чама Тэнантомгынына ейвэчу ԓыӈыркынинэт.
Торвэтгытрэԓятык Иисусынэ ганкэтъоӈатԓен Иона, иӈӄун рыкаԓыровык миӈкэмиԓ рэвъигъэ Ытԓён, ынкъам минкэмиԓ рэюгъэ. Чама Иисусына нэнанкаԓыровӄэнат нинэвияԓьыт миӈкэмиԓ гэӄыԓгиԓюԓинэт аӄагты нымытак.
Эмрэвинрэнӈэ таӈэты чичевык кэԓикэл, ачгыта гэкэԓиԓинэт ӈиръэ еԓыԓьатгыргыт-ԓыгъоравэтԓьаеԓымэԓ ынкъам руссиԓьыеԓымэԓ ваԓьыт. Руссиԓьыеԓымэԓ ваԓьын каԓегыргык-ымыԓьорык ԓыги ԓынъё Синодальный еԓыԓьатгыргын. Лыги ԓынъёԓӄыԓ руссильыеԓымэԓ ынкъам ԓыгъоравэтԓьаеԓымэԓ ваԓьыт еԓыԓьатгыргыт ванэ ӄонпы ыннаны ныпэранат. Кэԓюӄ аԓва ваԓьыт кэԓит тэнмычьо гэԓгыԓинэт еԓыԓьатынво, чама ԓыгаԓва ваԓьыт йиԓыт, аԓва ваԓьын культура ымы нымытвагыргын гамгавараткэн.
Лымӈэ пагчеӈэты ваԓьыт, кыннытаӈӄэнат иллюстрацият кэԓичитыԓьин Ирина Павлишинан гайпатԓенат кэԓик, ынан танынкаԓыровнэн ынко пыӈыԓ мэтъатвыткоԓьэн Ионан.
Моргынан мычвыно мытыԓгыркын иӈӄун кэԓигитэпԓыткук ӈотӄэн эмэйӈыкыԓьин кэԓикэԓ Пэтывэтгычьаткэн тури рэпэгчиӈэнӈытык кэԓигитэк ымыԓьэты Библия. Институт Библияеԓыԓьаткэн инэнвэԓынкыӄунэвыркын ымыԓьорыкы еԓыԓьатыԓьэты, танкавӈатыԓьэты каԓегты мэтъатвыткоԓьэн Ионан, ымы ымыԓьорыкы микынти гэвинрэтԓинэт рытэнмаватык ӈоткэн кэԓикэԓ каԓенво.
Ӈотӄэн кэԓикэԓ, ымы ӄутти кэԓит Библиякэн еԓыԓьатъёттэ ԓыгъоравэтԓьаеԓеты, каԓеёттэ вэтгавъёԓгык ымы электронный ванвык танԓьо сайтык Институтык Библияеԓыԓьаткэн (ibt.org.ru).


ԓыгъоравэтԓьэн
http://ibt.org.ru/bible
Кэԓикэԓ Ионан, Таӈпыӈыԓ Луканэн


Creative Commons: by-nd: © Institute for Bible Translation; This work is licensed under the Creative Commons Attribution-NoDerivatives 4.0 International License. To view a copy of this license, visit http://creativecommons.org/licenses/by-nd/4.0/.

Институт перевода Библии
Институт перевода Библии, 101000 Москва, Главпочтамт, а/я 360
ibt_inform@ibt.org.ru
назад
закрыть

Этын гавэтгавԓен Ионана

1 Аны-ӄун-ым, Этын гавэтгавԓен Ионана, аккагты Амафийын:
2 «Ӄытэнмаквэ, ӄыԓӄытги Ниневиягты – майӈынымнымэты ынкъам мэйӈыӄуԓитэ ӄывэтгаквэ ынкы, миӈкри ӄун тармачьыӈгыргыт ынкэкин Гымнан ԓыги тытчынэт».
3 Иона чимгъугъи гынтэвкы Этынвэпы. Етгъи Иоппиягты ынкъам ԓьунин ԓеԓьутвъэт эквэтыԓьыԓӄыԓ Фарсисэты, виԓытриԓнин тыԓянвын ынкъам ытвычыкутгъи тыԓянво ӈэнри Этынвэпы.

Аечгиӈын

4 Ынръам-ым Этынва рытомгавнэн аӈӄак армакытыйгычгын, ынкъам аӄайгыръочгатгъэ, рыпэт-ым ԓеԓьутвъэт ӄымэк нычимиръэтӄин.
5 Айыԓгыръогъат ытвыԓьыт, айӈавыткоӈӈогъат амӄынченэтэтынвэты. Нанэнтыткоӈӈонат ытвыйыръыт мыркоӈ нъаԓынво, Иона-ым ытвычыкутгъи ынкъам ԓыгиӄийыԓӄэтгъи.
6 Ынкы етгъи ыныкы ытвэрмэчьын ынкъам иквъи: «Ынръам иам йыԓӄэтыркын? Вынэ ӄыԓӄутги ынкъам ӄъэйӈэвыткуги чиниткин Этынвэты, юрэӄ Ынан мури наракэтъомык ынкъам ӄымэԓ ӄырым мынраквачамык».
7 Аӈӄаԓяйвыԓьыт иквъэт ыргичгу: «Китаӄун мынтэнгыӈэнмык ԓыги рытчынво, мэкгыпы мытраквачаркын». Ынӈин-ым тэнгыеӈэтгъэт ынкъам нэԓьугъэн Иона.
8 Ынкы никвъэн ытԓён: «Ӄикви морыкы, мэкгыпы аӄагыргын морыкы вагъэ? Миӈкы нытгиԓивигыт ынкъам мэӈӄо тыԓеркын? Миӈкы гынин нутэнут, ръавараткэнайгыт?»
9 Иквъи ытԓён ырыкы: «Гым – еврейыԓьэгым, тыԓымаԓявыркын Этынвэты Тэнантомгыӈэты иикин, микынэ рытомгавнэн аӈӄы ынкъам нутэсӄын».
10 Люур эӄэԓинръугъэт оравэтԓьат. Ынкъам иквъэт ыныкы: «Гэрэӄигыт ынӈин гитигыт»? Ӄэԓюӄ-ым нэԓкыԓгъэн ӈотэнъоравэтԓьата, иӈӄун ытԓён гынтэвыркын Этынвэпы, миӈкри чинит ытԓён гивԓин.
11 Никвъэн ытԓён: «Миӈкри мынынтыгыт ынратвэнво морыкы аӈӄы? Ӄэԓюӄ аӈӄы панэна ныгтанӈэԓётӄэн».12 Ӄынвэр ынан ивнинэт ытри: «Ӄинэпиритык гым ынкъам ӄинэнинтытык аӈӄагты, – вытку ынкы аӈӄы рэнрэтвигъэ торыкы, миӈкри гымнан ԓыги, иӈӄун гымыкайпы аӄайгыръочгатгъэ».
13 Ытръэч-ым ынӄэнат оравэтԓьат арматэвыръогъат ӈыпанво нотасӄэты. Наӄам ныԓвавӄэнат, ӄэԓюӄ эйычгин ныпытӄэрмэтвиӄин.
14 Ӄынвэр эйӈэвыткугъэт ытри Этынвэты ынкъам иквъэт: «Мытванԓяркын Гыныкы, Этынвэгыт, авнараквачака мынинмык ӈотэнъоравэтԓьайпы, эвнэтинэнъэӄэӈыткукэ морыкы нитгъэн въэгыргын тымӈэтваԓьэн оравэтԓьэн, миӈкри ӄун рыԓеркын чимгъуу ԓынъё Гынан, Этынвэгыт!»
15 Нэпиригъэн Иона ынкъам нэнинтыгъэн аӈӄагты, эвырӄэй ынрэтвигъи аӄайгиӈын.
16 Майӈайыԓгыръогъат ынӄэнат оравэтԓьат Этынвэты, инэтриԓетгъэт Ыныкы ынкъам энатватгъат инэтриԓетык ӄонпы.