Prov.1.8
Prov.3.14
Prov.1.7
1Kgs.3.9-1Kgs.3.12; Jas.1.5
Prov.30.5
1Sam.2.9; Ps.90.11
Prov.1.3
Prov.10.23; Prov.15.21; Jer.11.15
Ps.124.5; Prov.14.2
Prov.6.24; Prov.7.5; Prov.23.27
Prov.5.5; Prov.7.27
Ps.36.11; Matt.5.5
Prov.10.30

СУЛАЙБАН

АВАРАГЛИС

АᴴКЪЛОВА

Библия таржама йогьцас Институт

Москва

2005

Сулайбан авараглис аᴴкълова
Автор перевода – М.Ш. Халилов
Богословский редактор – Я.Г. Тестелец
Филологический редактор – П.М. Абдулмеджидова
ISBN 5-93943-071-6
© Библия таржама йогьцас Институт, 2005

Аьᴴйда̄йаже

Хирияв инсан! Гьуна ми хъовал кōъ йокчийо «Сулайбан авараглис аᴴкъловалӀо» нисойо тӀек. Гьолълъо тӀеклиъ гей тели аᴴкъилабла кицийана пайдаябла аᴴкъло-малъийана. ЖугьутӀ халкъиланна христиалла̄нна (насранияллинна) хирияб тӀек – Библиялис гьоᴴс итӀино бутӀа гей вагьли. ЖугьутӀ мицагъа чахийо вагьли тӀек йуьᴴхонна гей батӀ-батӀаябла халкъила̄ла гьōᴴ-гьоᴴсчӀитӀ мица̄гъа. Же бежкьала мицагъа йуьᴴхолло вагьди гьикматаб тӀек йеᴴгьена аьᴴйда̄ гунна гей мина.
Израиллила халкъилаъ эᴴдо бахъийа̄ аᴴкъилабла аьдамла̄ аᴴкълова̄сна кицийа̄сна вагьди тӀек къацӀокӀал муьхобалъийо желагъа къона гьазайна лъиначӀитӀ лӀӣгъана аьᴴйда̄. ВагьалӀо тӀеклиъ гаьгьийа̄ телида̄с аᴴкъилабла йаьжбо Давуд авараглила оьждис – Сулайбанис гейлӀо нийасос зукъойо. Сулайбан авараг Израиллил пачалъилаъ зукъойо илос эра йоᴴкъал аьᴴйда̄ ацӀонасла асрулаъ. Сулайбан машгьур ахъна зукъойо йилӀа аᴴкъилаб сукӀолӀо нисона, вагьди тӀекна нитоназу гьолцос тӀеклӀо нисос зукъойо.
Библиялиъ чахна гей: дул йатӀийосинаб нилӀаллӀо Сулайбан авараглихъа Аллагьли нисолъ, гьолцо Аллагьлихъа гьарзи йогьна гей, дибола халкъилал битӀараб гьоькмо бованна, кӀетӀо-цаццо гьацокӀал аᴴкъилаб къаьмна нилӀа дибола лагълиллӀо нисона. Аллагьли Сулайбан авараглихъа нисона гей: «Бихало омрона, бечелъина, тушмалла̄кьа бийажейолъина гьарзи йойчӀе, ми гьарзи йōс битӀараб гьоькмо бовал аᴴкъиллъи, – вагьло дибо гьари къабул богьна, гьуна до дул ницца аᴴкъилаб къаьм. Дӯгъа аьᴴйда̄на ахъеэш милъийо аᴴкъил, дӯгъа мугъатта̄на ахъассаъ. Гьолълъокьа кьодо ми гьарзи йойэшна нилӀал – бечелъина нилӀал, дибо ца̄на тӀибизийовал. Бихало омрона нилӀал до дул, дибо або Давудцой, мина диела гьидлакьа̄ эᴴкье-гогьда, дие амрона тӀубази богьда». Аллагьлиъкьа̄ аᴴкъиллъи йиᴴхъона муьгъатта̄, Сулайбан авараг ахъийо вагьалӀо дуниялликьа ба̄хъийа̄ъ эᴴдо бишшун аᴴкъилаб сукӀо.
ТӀек йогьна гей лади асрула̄ла замалла̄ъ къацӀобакӀийа̄на сидкьас гьоᴴсо ча̄хийана лади мажмуъла̄с. Вагьла̄ вагьалӀо тӀеклиъ нийалӀна гей Агурисна Лемуэл парчагьлисна аᴴкъилабла йаьжла̄с къона итӀино мажмуъна. БатӀ-батӀаябла мажмуъла̄с къацӀобакӀна йōйо тӀек гаьлълъо, гьоᴴсо аᴴкъилабла йаьжбо кӀа̄-кӀахна ча̄хна йиᴴйахъос.
Библия таржама йогьцала Институтли бōва комаклиъкьа̄ рес бахъийо «Сулайбан авараглис аᴴкъловалӀо» нисойо тӀек Дагъисталлила бадло мица̄кьана йуьᴴхолал. Вагьди тӀек бежкьала мицагъад йуьᴴхолло филологияб илмолас доктор, профессор Халилов Мажиди. ТӀек басмалаъ йагъова̄с кул гей вагьалӀо тӀекли бежкьала халкъилала руьгьанияб оьмролаъ эᴴдо гьоᴴс кӀетӀо маьче бохцалакьа.
Библия таржама йогьцас Институт


бежкьалас миц
http://ibt.org.ru/bible
Сулайбан авараглис аᴴкълова, Лука ме̄йо Рохеллис Хабар


Creative Commons: by-nd: © Institute for Bible Translation; This work is licensed under the Creative Commons Attribution-NoDerivatives 4.0 International License. To view a copy of this license, visit http://creativecommons.org/licenses/by-nd/4.0/.

Институт перевода Библии
Институт перевода Библии, 101000 Москва, Главпочтамт, а/я 360
ibt_inform@ibt.org.ru
назад
закрыть

КӀетӀа̄ гьинода

1 Йе дие оьжо, дие йаьжбо аьᴴдалаъ йеᴴйагьда,
гьула̄зу дие амро-насигьатлана ми дибола йакӀиъ йовахда,
2 Аᴴкъиллъилахъа энекзи йахъал аьᴴгъана жухъна зогъда,
аᴴкъло михъаллакьа йакӀис кулна зогъда,
3 Аᴴкъло-насигьатна ми дудой илӀеда,
аᴴкъло-лъайна дудой бокӀда,
4 Окколас аьᴴгачой ми гьулина йиᴴзда,
мизаъ йиᴴхъолло хазиналгъацой, ми гьолълъогъой муьгъалӀна эᴴкьеда,
5 БетӀергьаллихъа гьичӀейолъи сийо жо йахъцасна йикъеш дул,
Аллагьлила илмолакьана оᴴкъас ми.
6 БетӀергьаллийа̄ъ аьᴴкъиллъи ницца,
Гьолцоъкьа̄йа̄ъ цӀодорлъина лъайна михъос.
7 ЙакӀо йаᴴцова̄ аьдамла̄л кō гуцӀолал нитоназу гьаьдураб гей Гьули,
гьаьлаллъилаъ мекье-гугьцалал къейо тил тухъинна эчеш Гьули.
8 РитӀухълъилаъ эᴴкье-гогьцалас гьинодана цӀуми йовагьца Гьолцо,
гьинила муъмин-сукӀос гьинодана гьинкъи гаьчча̄ йовагьца.
9 Дӣхъа энекзи ахълъо, йакӀо йаᴴцōлъина, битӀараблъина, гьаьлалаблъина – вагьли сийо йахъцана дул йикъеш,
гьула̄зу дибо къацӀцӀа̄ гьинодана кӀетӀа̄ йа̄хъца.
10 Дул аᴴкъиллъи йиᴴхъолъ,
илмо-лъайна дибола руьгьлил ахо бахъца.
11 Бета кӀетӀо-цаццо гьацокӀал йикъейа жойла ми цӀуми овас,
цӀодорлъила ми тиса уьᴴхолаш.
12 Чикейа̄ аьдаьмла̄ла гьидсо ми аᴴкъиллъила цӀуми овас,
мекъаб-тӀекъаб нисоцала̄кьасна хъосар овас.
13 КолӀлӀа̄ гьинода̄кьа̄ мекьал ба̄тӀна,
гьолло кӀетӀо гьино йечанне̄ш.
14 Кешлъи йōвакьа рази ба̄хъца гьоллōл,
чикейа пасадлъилакьана гьоллос йакӀода цӀийабалӀос.
15 Гьоллос гьинодана чӀикӀ-чӀекӀдийа̄ гей,
гьоллокьалакьа̄ мекьейа̄сна гьино кьичӀеш.
16 Аᴴкъиллъила цӀуми ōс ми сукӀола ахъакьасна,
гьолълъола бихха мицакьасна.
17 Оьлохъанлъилаъ зукъойо гьудул эчанне̄йо гьолълъо,
гьинила Аллагьли халкъилал нилӀийо йаьжена амрона шоъилло гьолълъо.
18 Гьолълъола билӀо-къайлина ми хелликьа оᴴкъолца,
гьолълъос гьинона бувагъова̄дой эᴴкьецас гьино гей.
19 Гьолълъодой гьицакийо гьоᴴсна сукӀо кьа̄ь оᴴкъаъас,
цӀиддаса оьмролаш гьинона гьоллол йиᴴхъаъас.
20 Вагьалълъобза ми кӀетӀа гьидкьа̄ эᴴкье-гогь,
муъмилла̄с гьинона ми йоха.
21 ЙакӀо йаᴴцова̄ аьдамла вагьалӀо Аллагьли нилӀийа мицакьа ба̄хъца,
мунагьла гаьчча̄на ракьликьа кьодо гьихбалъос.
22 ЙакӀо чикейа̄ аьдамлана дунналикьас бовахна тӀувацца,
хийанатлъи йогьцас аьдамлана мицакьас хемухаъасзу боваъилца.