1Kgs.4.31; Prov.10.1; Prov.25.1; Eccl.12.9
Prov.2.9
Prov.8.5
Job.28.28; Ps.110.10; Prov.8.13; Prov.9.10; Prov.16.6
Prov.6.20
Prov.4.9
Deut.13.8; Prov.16.29
Ps.9.30; Ps.63.5; Jer.5.26
Num.16.32-Num.16.33; Ps.123.3; Ps.27.1
Ps.1.1; Prov.4.14; Prov.24.1
Prov.6.18; Isa.59.7; Rom.3.15
Prov.15.27
Prov.8.1; Prov.9.3
Prov.8.5; Ps.1.1; Prov.21.24
Isa.65.12; Isa.66.4; Jer.7.13
Ps.106.11
Ps.2.4
1Sam.8.18; Job.27.8-Job.27.9; Isa.1.15; Jer.11.11; Ezek.8.18; Mic.3.4
Jer.6.19

СУЛАЙБАН

АВАРАГЛИС

АᴴКЪЛОВА

Библия таржама йогьцас Институт

Москва

2005

Сулайбан авараглис аᴴкълова
Автор перевода – М.Ш. Халилов
Богословский редактор – Я.Г. Тестелец
Филологический редактор – П.М. Абдулмеджидова
ISBN 5-93943-071-6
© Библия таржама йогьцас Институт, 2005

Аьᴴйда̄йаже

Хирияв инсан! Гьуна ми хъовал кōъ йокчийо «Сулайбан авараглис аᴴкъловалӀо» нисойо тӀек. Гьолълъо тӀеклиъ гей тели аᴴкъилабла кицийана пайдаябла аᴴкъло-малъийана. ЖугьутӀ халкъиланна христиалла̄нна (насранияллинна) хирияб тӀек – Библиялис гьоᴴс итӀино бутӀа гей вагьли. ЖугьутӀ мицагъа чахийо вагьли тӀек йуьᴴхонна гей батӀ-батӀаябла халкъила̄ла гьōᴴ-гьоᴴсчӀитӀ мица̄гъа. Же бежкьала мицагъа йуьᴴхолло вагьди гьикматаб тӀек йеᴴгьена аьᴴйда̄ гунна гей мина.
Израиллила халкъилаъ эᴴдо бахъийа̄ аᴴкъилабла аьдамла̄ аᴴкълова̄сна кицийа̄сна вагьди тӀек къацӀокӀал муьхобалъийо желагъа къона гьазайна лъиначӀитӀ лӀӣгъана аьᴴйда̄. ВагьалӀо тӀеклиъ гаьгьийа̄ телида̄с аᴴкъилабла йаьжбо Давуд авараглила оьждис – Сулайбанис гейлӀо нийасос зукъойо. Сулайбан авараг Израиллил пачалъилаъ зукъойо илос эра йоᴴкъал аьᴴйда̄ ацӀонасла асрулаъ. Сулайбан машгьур ахъна зукъойо йилӀа аᴴкъилаб сукӀолӀо нисона, вагьди тӀекна нитоназу гьолцос тӀеклӀо нисос зукъойо.
Библиялиъ чахна гей: дул йатӀийосинаб нилӀаллӀо Сулайбан авараглихъа Аллагьли нисолъ, гьолцо Аллагьлихъа гьарзи йогьна гей, дибола халкъилал битӀараб гьоькмо бованна, кӀетӀо-цаццо гьацокӀал аᴴкъилаб къаьмна нилӀа дибола лагълиллӀо нисона. Аллагьли Сулайбан авараглихъа нисона гей: «Бихало омрона, бечелъина, тушмалла̄кьа бийажейолъина гьарзи йойчӀе, ми гьарзи йōс битӀараб гьоькмо бовал аᴴкъиллъи, – вагьло дибо гьари къабул богьна, гьуна до дул ницца аᴴкъилаб къаьм. Дӯгъа аьᴴйда̄на ахъеэш милъийо аᴴкъил, дӯгъа мугъатта̄на ахъассаъ. Гьолълъокьа кьодо ми гьарзи йойэшна нилӀал – бечелъина нилӀал, дибо ца̄на тӀибизийовал. Бихало омрона нилӀал до дул, дибо або Давудцой, мина диела гьидлакьа̄ эᴴкье-гогьда, дие амрона тӀубази богьда». Аллагьлиъкьа̄ аᴴкъиллъи йиᴴхъона муьгъатта̄, Сулайбан авараг ахъийо вагьалӀо дуниялликьа ба̄хъийа̄ъ эᴴдо бишшун аᴴкъилаб сукӀо.
ТӀек йогьна гей лади асрула̄ла замалла̄ъ къацӀобакӀийа̄на сидкьас гьоᴴсо ча̄хийана лади мажмуъла̄с. Вагьла̄ вагьалӀо тӀеклиъ нийалӀна гей Агурисна Лемуэл парчагьлисна аᴴкъилабла йаьжла̄с къона итӀино мажмуъна. БатӀ-батӀаябла мажмуъла̄с къацӀобакӀна йōйо тӀек гаьлълъо, гьоᴴсо аᴴкъилабла йаьжбо кӀа̄-кӀахна ча̄хна йиᴴйахъос.
Библия таржама йогьцала Институтли бōва комаклиъкьа̄ рес бахъийо «Сулайбан авараглис аᴴкъловалӀо» нисойо тӀек Дагъисталлила бадло мица̄кьана йуьᴴхолал. Вагьди тӀек бежкьала мицагъад йуьᴴхолло филологияб илмолас доктор, профессор Халилов Мажиди. ТӀек басмалаъ йагъова̄с кул гей вагьалӀо тӀекли бежкьала халкъилала руьгьанияб оьмролаъ эᴴдо гьоᴴс кӀетӀо маьче бохцалакьа.
Библия таржама йогьцас Институт


бежкьалас миц
http://ibt.org.ru/bible
Сулайбан авараглис аᴴкълова, Лука ме̄йо Рохеллис Хабар


Creative Commons: by-nd: © Institute for Bible Translation; This work is licensed under the Creative Commons Attribution-NoDerivatives 4.0 International License. To view a copy of this license, visit http://creativecommons.org/licenses/by-nd/4.0/.

Институт перевода Библии
Институт перевода Библии, 101000 Москва, Главпочтамт, а/я 360
ibt_inform@ibt.org.ru
назад
закрыть

Байбикил

1 Давудила оьждис, Израиллиъ ханлъилаъ зукъова Сулайбанис, аᴴкъилабла йаьжбо гей вагьаддōл.
2 Гьоддōл ча̄хна гей аьдамла̄л аᴴкъло мокъанна,
цӀодорлъилаъна адло-тадбирлиъна гьоллōл муьхо-маьханна,
аᴴкъилабла йаьжла̄ш гьоллол маьъна бикъанна.
3 Вагьаддōл ча̄хна гей аьдамла̄ъ адло-тадбир телилъанна,
къацӀцӀо гьаькъабна, ритӀухъабна, бацӀадабна гьоллола йакӀкьа йеᴴцанна.
4 Аᴴкъло гаьчча̄л аᴴкъло мокъанна,
оьлохъаллил илмо-лъайна бичӀна михъанна.
5 Вагьаддōл йаьжбо аьᴴдалаъ йеᴴйагьда,
аᴴкъиллис лъайна телилъас,
цӀодораблис цӀодорлъи-аᴴкъиллъи кӀетӀлъас.
6 Кици-бицеллис маьънана каламна бикъанна,
аᴴкъилабла̄ла йаьжла̄ъ гаьгьийо балъголъи йикъанна
ча̄хна гей вагьаддōл аᴴкълова.

Абола малъилахъа энекзи ахъ!

7 БетӀергьан Аллагьлихъа гьичӀейолъи – вагьли гей илмо-лъайлис бигъа.
Аᴴкълована насигьатлана йа̄тӀаъцаса ба̄хъца аьбдалла.

Кьодда̄с аᴴкъло-лъай

Мунагьликьас инкар бōйолъи

8 Ми энекзи ахъ, дие оьжо, абола малъилахъа,
ийос нисойона йугъола̄къа.
9 Дибола къаьмил къиматаб матӀайиᴴцо йахъца гьули,
билъалъил кӀетӀо тетенана йахъца гьули.
10 Йе дие оьжо, мунагь-гьаькълила агьлола гьидедой кьисада,
эᴴкьа̄къа муьгъалӀ.
11 Гьолло дӯхъа нисас:
«Тос илогъой, гьинона йохна гьоᴴс пуланаб сукӀо икьал.
Аьйиб гаьччо сукӀо икьал гьаьй йохал тос.
12 Боваханна бовахна вагьаллийа̄ аьдамла иле,
журжагьлицой, къацӀцӀа̄ мийаълал,
шуналицой къацӀца̄ мизаъ мийахъолал.
13 Илол михъас батӀ-батӀаяб хазина,
илосзу билӀована бечедабли давлалис йилӀа йовацӀлал.
14 Мина илогъой къацӀо цӀула йагъос,
окколас кисана илос къацӀос бахъца!»
15 Вере, дие оьжо, ми гьоллола гьид эᴴкьа̄къа,
гьоллола гьиддойс ми ата̄ боха дибо хаьба.
16 Гьоллос хаьба̄ кешлъилал чӀанабагъос,
гьеᴴ къе̄ мейал бохойбалъечӀе гей гьоллōл.
17 Пайда гаьъа къӣ тӀутӀийас,
йогбаццала мигьна̄нна йеганна.
18 Гьидесзу гьеᴴ къе̄ мейал гьоллōл гьинона йохна бечена гей,
гьидесзу руьгь бугъолцас гей гьоллōл.
19 Гьаьрамаб давла батӀийас гей вагьаллийо гьино,
вагьло давла кōъ михъōйо сукӀона угъолца гьолълъо.

Аᴴкъиллъи аьдамчой йикълашеш

Къабул йовагьеэса малъийа

20 Аᴴкъиллъила къатӀлиъкьа̄ аьгьи богьцас гей,
будакӀаллиъкьа̄ гьокӀ йагъона илӀеш гьолълъо,
21 Хъуй-гьай тели гаьгьийа мицаъ илӀелацас гей,
шагьарбала кавлидой йечена,
аᴴкъиллъила вагьаддийа̄ йаьжбо нийасоцас гей:
22 «Йа, кьолла̄ аьдамла, нитокцалди мизол вагьли аьнтлъи хира йахъца?
Йа, йаьгь-ламус гаьчча̄ аьдаьмла, нитокцалди миже кеп йокчиш кӀетӀосинабликьа лъоᴴвабана?
Йа, аьбдалла, нитокцалди мизол илмо-лъай цӀодоло бегас?
23 Дие йаьжбо аьᴴдалаъна йеᴴйагьна, миже кантӀизи ба̄хъда,
до мизокьа гуъал диела йакӀиъ гаьгьийосинаб жо,
дие йаьжбона йеᴴйагьал мизол.
24 До илӀела̄йо – миже энекзи ба̄хъеэш,
до кō гуцӀолло – лъона гьули йохеэш.
25 Миже йовахеэш къацӀцӀа̄ дие аᴴкълова,
дие малъийана мизола йакӀил оьвалеэш.
26 Вагьалълъобза дона лъоᴴва̄л мизокьа балагь мокъа̄лъо,
дона кеп йокчал мизокьа йукъо гьинкъи кьодо йоᴴкъа̄лъо.
27 Мизокьа гьасаъас гьолошиги-болоцой йукъо гьинкъи кьодо йоᴴкъа̄лъо,
йилӀа йукъо залӀоцой балагь кьодо мокъа̄лъо,
акъуба-къарилъила билӀабакъонна боваха̄лъо,
28 миже дӣхъа илӀелаба̄л муьхобалъдана, до энекзи йахъаъас,
до йиᴴзал муьхобалъдана, мизол до йиᴴхъаъас,
29 илмо-лъайна мизол батӀаъалъ,
БетӀергьаллиъкьа̄ мокъоцас гьинкъина къабул боваъалъ,
30 Дие аᴴкъло-насигьатлана аьᴴдалаъ йеᴴйагьаъалъ,
дие малъна бохаъалъ.
31 Гьидела лъаькъейа̄ ишла̄ла хоьхкьа гуцӀойо чикейо пихъ йуьᴴхъча гьолло,
гьидела чикейа̄ пикрова̄ оᴴхана йовацӀилца гьолло,
32 кьолла̄ аьдамла̄ла гьинода̄ гьоллōл бувагъоллъо,
аьбдалла̄слъийо пикро гаьччолъила гьоллōл пасад бовагьлъо.
33 Амма дӣхъа энекзи ахъцас сукӀо сагъ-саламатлъилаъ гьихлъас,
балагьлихъа гьичӀечӀе гьули раьгьатлъилаъ ахъас».