Зынаргъ чиныгкӕсӕг!

Дӕ къухы ирон ӕвзагмӕ тӕлмацгондӕй сты Библийы фыццаг хайы, Рагон Фӕдзӕхсты, фыццаг дыууӕ чиныджы – Райдиан ӕмӕ Рацыд. Уыцы чингуытӕ Ног Фӕдзӕхстимӕ хаст ӕрцыдысты Библимӕ. Рагон Фӕдзӕхст нын ӕвдисы дӕргъвӕтин рӕстӕг – дуне сфӕлдисынӕй дунемӕ Йесо Чырыстийы ӕрцыды онг. Фӕлӕ йӕ темӕ иу у – Хуыцау дзуттаг адӕмимӕ цы фидыд сарӕзта, уый. Уыцы фидыд ӕвдисы Хуыцауы уарзт адӕймагмӕ.
Рагон Фӕдзӕхсты сӕрӕй лӕууынц Моисейы фондз чиныджы. Уыцы фондз чиныджы дзырд райдайы дуне сфӕлдисыны цауӕй ӕмӕ фӕвӕййы, дзуттӕгтӕ, Хуыцау семӕ цы сӕрмагонд бадзырд сарӕзта, уымӕ гӕсгӕ зӕрдӕвӕрд зӕххыл куыд ӕрцӕрынц, уымӕй. Фондз чиныджы цаутӕн сӕ фылдӕр хай баст у пехуымпар Моисейы номимӕ. Дзуттаг адӕмӕн Моисей дзӕвгар рӕстӕг уыди сӕ раздзог, ӕмӕ йӕ фӕрцы Хуыцау ныхас кодта семӕ. Уымӕ гӕсгӕ ма Библийы фыццаг фондз чиныджы арӕх фӕхонынц уый номӕй дӕр – «Моисейы фондз чиныджы», зӕгъгӕ.
Моисейы фыццаг чиныг Райдиан райдыдта дуне сфӕлдисынӕй ӕмӕ ӕвдисы дунейы историйы фыццаг къахдзӕфтӕ. Дарддӕр дзы ныхас цӕуы, Авраам бындур кӕмӕн ӕрӕвӕрдта, Хуыцауы уыцы ӕвзӕрст адӕмыл – дзуттӕгтыл. Авраамӕй рацыдысты хӕстӕгскӕсӕйнаг адӕмтӕй бирӕтӕ, уыдонимӕ дзуттаг адӕм дӕр. Дзуттӕгтӕ цалдӕр ӕнусы Мысыры куыд цардысты, стӕй фараоны ӕфсондзӕй куыд фервӕзтысты, ууыл дзурӕг у Моисейы дыккаг чиныг Рацыд. Чиныгӕн йӕ сӕйраг мидис у, Хоривы хохы цур Хуыцау Израилимӕ (дзуттаг адӕмимӕ) кӕй сарӕзта, уыцы фидыд. Рацыды дыккаг хай чиныгкӕсӕджы зонгӕ кӕны дзуттаг адӕмы дин ӕмӕ царды ӕгъдӕуттимӕ. Уыцы ӕгъдӕуттӕм гӕсгӕ цӕрын дзуттаг адӕмӕн Хуыцау бафӕдзӕхста, семӕ фидыд куы сарӕзта, уӕд. Уыцы уагӕвӕрдтӕй бирӕтӕ махмӕ абон фӕкӕсдзысты зӕронд, цыма нӕ абоны цардмӕ ницы бар дарынц, афтӕ. Фӕлӕ уыдон, уӕлдайдӕр та Дӕс фӕдзӕхсты, ӕмхуызон ӕмбӕрстгонд сты кӕцыфӕнды дуджы цӕрӕг адӕймагӕн дӕр. Куыд ахсджиаг сты, уый тыххӕй Евангелиты Йесо Чырысти иу ӕмӕ дыууӕ хатты нӕ загъта.
Адам, Ной, Авраам, Исаак, Иаков, Иосиф, Моисей – Райдианы ӕмӕ Рацыды сӕйраг архайджытӕ – стыр бынат ӕрцахстой дунеон культурӕйы уацмысты. Уымӕ гӕсгӕ сӕ хорз зонынц, Библи ӕппындӕр чи никуы бакасти, суанг ахӕм адӕймӕгтӕ дӕр. Фӕлӕ цас хуыздӕр уаид, чиныгкӕсӕг сыл «лӕгӕйлӕгмӕ» Библийы фӕрстыл куы фембӕлид, уӕд!
Райдиан ӕмӕ Рацыд, ӕппӕт Рагон Фӕдзӕхстау, фыццаг уыдысты дзуттаг ӕвзагыл фыст. Ирон ӕвзагмӕ дӕр тӕлмацгонд ӕрцыдысты уыцы ӕвзагӕй. Фӕлӕ тӕлмацыл куыст ууыл нӕ ахицӕн уыдзӕн. Мах нӕ зӕрдӕ дарӕм, Рагон Фӕдзӕхст ӕнӕхъӕнӕй ирон ӕвзагыл кӕй фӕзындзӕн, ууыл – ныридӕгӕн ыл кусынц тӕлмацгӕнӕг ӕмӕ зонадон организацитӕ. Ныртӕккӕ та Ног Фӕдзӕхст ирон литературон ӕвзагмӕ тӕлмацӕй рауагъта Библи тӕлмацгӕнӕг институт.
Библи тӕлмацгӕнӕг институт зӕрдиагӕй арфӕ кӕны, Райдиан ӕмӕ Рацыд ирон ӕвзагмӕ раивыныл чи куыста, мыхуырмӕ сӕ чи бацӕттӕ кодта, уыдонӕн. Тынг ӕхсызгон нын у, абон ирон адӕмӕн Хуыцауы Ныхас сӕ мадӕлон ӕвзагыл кӕсыны фадат кӕй ис, уый.
Библи тӕлмацгӕнӕг институт

Ирон æвзаг
http://ibt.org.ru/bible
Рагон Фӕдзӕхст, Библи тӕлмацгӕнӕг институт Мӕскуы 2006. Нӕ Хицау Йесо Чырыстийы, Библийы тӕлмацы институт Мӕскуы 2004


Copyrighted: © Библийы тӕлмацы институт Мӕскуы 2004

Библи тӕлмацгӕнӕг институт
Институт перевода Библии, 101000 Москва, Главпочтамт, а/я 360
ibt_inform@ibt.org.ru
назад
закрыть
:

Райдиан

1 Райдианы Хуыцау сфӕлдыста арв ӕмӕ зӕхх.
2 Зӕхх уыди ӕмтъеры ӕмӕ ӕдзӕрӕг, ӕгӕрон фурд аныгъуылди мылазон тары, ӕмӕ Хуыцауы Уд зылди доны сӕрмӕ.3 Хуыцау загъта: «Уадз фӕзынӕд рухс». Ӕмӕ фӕзынди рухс.4 Хуыцау федта, рухс хорз кӕй у, уый. Ӕмӕ Хуыцау рухс фӕхицӕн кодта талынгӕй.5 Хуыцау рухс схуыдта бон, талынг та – ӕхсӕв. Ӕмӕ уыд изӕр, ӕмӕ уыди райсом – фыццаг бон.6 Хуыцау загъта: «Уадз дӕтты ӕхсӕн фӕзынӕд ӕрдынцар, ӕмӕ дон фӕхицӕн кӕнӕд донӕй».7 Хуыцау сарӕзта ӕрдынцар; ӕмӕ ӕрдынцары бын цы дон уыд, уый фӕхицӕн кодта, ӕрдынцары сӕрмӕ цы дон уыд, уымӕй. Ӕмӕ сси афтӕ.8 Хуыцау ӕрдынцар схуыдта арв. Ӕмӕ уыд изӕр, ӕмӕ уыди райсом – дыккаг бон.9 Хуыцау загъта: «Арвы бын цы дӕттӕ ис, уыдон ӕрбамбырд уӕнт иу ранмӕ, ӕмӕ разынӕд сур». Ӕмӕ сси афтӕ.10 Хуыцау сур схуыдта зӕхх, цы дӕттӕ ӕрбамбырд, уыдоны та схуыдта денджызтӕ. Ӕмӕ Хуыцау федта, афтӕ хорз кӕй у, уый.11 Хуыцау загъта: «Зӕхх раттӕд ахӕм зайӕгойтӕ: мыггаг згъалӕг кӕрдӕг ӕмӕ йӕ мыггаг йӕ дыргъы мидӕг кӕмӕн ис, ахӕм алыхуызон бӕлӕстӕ». Ӕмӕ сси афтӕ.12 Зӕхх радта ахӕм зайӕгойтӕ: мыггаг згъалӕг кӕрдӕг ӕмӕ, йӕ мыггаг йӕ дыргъы мидӕг кӕмӕн ис, ахӕм алыхуызон бӕлӕстӕ. Хуыцау федта, афтӕ хорз кӕй у, уый.13 Ӕмӕ уыд изӕр, ӕмӕ уыди райсом – ӕртыккаг бон.14 Хуыцау загъта: «Уадз арвыл уӕнт рухсгӕнӕнтӕ бон ӕхсӕвӕй хицӕн кӕнынӕн, нысӕнттӕ ӕвдисынӕн, рӕстӕджытӕ, бонтӕ ӕмӕ азтӕ зонынӕн;15 Ӕмӕ судзӕнт арвыл, цӕмӕй сӕ рухс кӕла зӕхмӕ». Ӕмӕ сси афтӕ.16 Хуыцау сфӕлдыста дыууӕ стыр рухсгӕнӕны: стырдӕр рухсгӕнӕн – боны фӕткӕн, къаддӕр рухсгӕнӕн – ӕхсӕвы фӕткӕн, ӕмӕ стъалытӕ.17 Хуыцау сӕ сӕвӕрдта арвыл, цӕмӕй рухс кӕной зӕхмӕ,18 Амоной бон ӕмӕ ӕхсӕв, ӕмӕ рухс хицӕн кӕной талынгӕй. Ӕмӕ Хуыцау федта, афтӕ хорз кӕй у, уый.19 Ӕмӕ уыд изӕр, ӕмӕ уыди райсом – цыппӕрӕм бон.20 Хуыцау загъта: «Дон ӕмызмӕлд кӕнӕд алыхуызон хилджытӕй, мӕргътӕ атӕхӕнт зӕххы сӕрмӕ, уӕлӕрвты».21 Хуыцау сфӕлдыста егъау денджызон цӕрӕгойты ӕмӕ, дон ӕмызмӕлд кӕмӕй кодта, уыцы хилджыты, стӕй алы мыггаг базырджын мӕргъты. Хуыцау федта, афтӕ хорз кӕй у, уый.22 Ӕмӕ сыл Йӕ арфӕ бафтыдта: «Цот уадзут ӕмӕ сбирӕ ут, байдзаг ут денджызты, ӕмӕ мӕргътӕ фылдӕрӕйфылдӕр кӕнӕнт зӕххыл».23 Ӕмӕ уыд изӕр, ӕмӕ уыди райсом – фӕндзӕм бон.24 Хуыцау загъта: «Зӕхх рауадзӕд цӕрӕгойтӕ – фосы, хилджыты, сырдты алы мыггӕгтӕ». Ӕмӕ сси афтӕ.25 Хуыцау сфӕлдыста зӕххон сырдты алы мыггӕгтӕ, фосы алы мыггӕгтӕ, ӕппӕт зӕххон хилджыты алы мыггӕгтӕ. Ӕмӕ Хуыцау федта, афтӕ хорз кӕй у, уый.26 Уый фӕстӕ Хуыцау загъта: «Сфӕлдисӕм адӕймаджы Нӕхи хуызӕн, Нӕхи ӕнгӕс; ӕмӕ паддзахиуӕг кӕнӕд денджызон кӕсӕгтыл, уӕларвон мӕргътыл, фосыл, ӕппӕт зӕххыл, ӕппӕт зӕххон хилджытыл».27 Ӕмӕ Хуыцау адӕймаджы сфӕлдыста Йӕхи хуызӕнӕй, сфӕлдыста йӕ Хуыцауы хуызӕнӕй; сфӕлдыста нӕлгоймаг ӕмӕ сылгоймаджы.28 Хуыцау сыл арфӕ бафтыдта ӕмӕ сын загъта: «Цот уадзут ӕмӕ кӕнут фылдӕрӕйфылдӕр, байдзаг ут зӕххыл ӕмӕ ут йӕ хицӕуттӕ. Уӕ дӕлбар уӕнт денджызон кӕсӕгтӕ, уӕларвон мӕргътӕ ӕмӕ зӕххыл хилӕг ӕппӕт цӕрӕгойтӕ».29 Хуыцау загъта: «Мӕнӕ уын Ӕз радтон, мыггаг згъалӕг зайӕгойтӕ ӕппӕт зӕххыл ӕмӕ, йӕ мыггаг йӕ дыргъы мидӕг кӕмӕн ис, уыцы алыхуызон бӕлӕстӕ: уыдон сымахӕн уыдзысты хӕрынӕн.30 Уд кӕй мидӕг ис, ӕппӕт уыцы зӕххон сырдтӕн, ӕппӕт уӕларвон мӕргътӕн ӕмӕ зӕххыл алы хилӕгӕн дӕр хӕрынӕн Ӕз дӕттын ӕппӕт зайӕгойтӕ». Ӕмӕ сси афтӕ.31 Хуыцау федта, цыдӕриддӕр сфӕлдыста, ӕппӕт уыдон, ӕмӕ йӕм фӕкастысты иттӕг хорз. Ӕмӕ уыд изӕр, ӕмӕ уыди райсом – ӕхсӕзӕм бон.